കുവൈത്തിലെ സൗത്ത് ഖൈത്താന്‍ മേഖലയില്‍ പരിശോധന; വിവിധ സ്ഥാപനങ്ങള്‍ അടച്ചുപൂട്ടി
കുവൈത്ത് സിറ്റി: സൗത്ത് ഖൈത്താന്‍ മേഖലയില്‍ കര്‍ശന പരിശോധന. ജനറൽ ഫയർഫോഴ്സ് നിരവധി സർക്കാർ ഏജൻസികളുമായി സഹകരിച്ചുള്ള കാംപെയിനിന്‍റെ ഭാഗമായി തിങ്കളാഴ്ച സൗത്ത് ഖൈത്താൻ മേഖലയിലാണ് പരിശോധന നടത്തിയത്. ആവശ്യമായ സുരക്ഷാ, അഗ്നി പ്രതിരോധ മാനദണ്ഡങ്ങൾ പാലിക്കാത്ത കെട്ടിടങ്ങളും സൗകര്യങ്ങളും നിരീക്ഷിക്കുകയും തിരിച്ചറിയുകയും ചെയ്യുകയെന്നതായിരുന്നു കാംപെയിനിന്‍റെ പ്രധാന ലക്ഷ്യം. ആഭ്യന്തര മന്ത്രാലയം, കുവൈത്ത് മുനിസിപ്പാലിറ്റി, പബ്ലിക് എൻവയോൺമെൻ്റ് അതോറിറ്റി, പബ്ലിക് അതോറിറ്റി ഫോർ മാൻ പവർ, ഇലക്ട്രിസിറ്റി മന്ത്രാലയം എന്നിവരാണ് കാംപയിനിൽ സഹകരിച്ചത്. കൃത്യമായ സുരക്ഷയും മാനദണ്ഡങ്ങളും പാലിക്കാത്തതും നിയമലംഘനങ്ങൾ കണ്ടെത്തിയതുമായ സ്ഥാപനങ്ങളാണ് അടച്ചുപൂട്ടിയത്. ആഭ്യന്തരമന്ത്രി ഷെയ്ഖ് ഫഹദ് യൂസഫ് സൗദ് അൽ – സബാഹിന്‍റെ നിർദേശപ്രകാരമാണ് പരിശോധന നടത്തിയതെന്ന് ജനറൽ ഫയർഫോഴ്സ് സ്ഥിരീകരിച്ചു. ജനറൽ ഫയർഫോഴ്സ് മേധാവി മേജർ ജനറൽ തലാൽ അൽ റൂമി നേരിട്ട് മേൽനോട്ടം വഹിച്ച കാംപയിനിൽ കുവൈത്ത് മുനിസിപ്പാലിറ്റി ആക്ടിങ് ഡയറക്ടർ ജനറൽ മനാൽ അൽ – അസ്‌ഫോറിൻ്റെ സാന്നിധ്യവും ഉണ്ടായിരുന്നു.
Comments (0)