Indian Rupee Depreciation: പ്രവാസികള്‍ക്കിപ്പോള്‍ ‘ഹാപ്പി ഡേയ്സ്’, ശമ്പളം വന്നതും രൂപയുടെ മൂല്യം ഇടിഞ്ഞതും ഒരുമിച്ച്; കേരളത്തിലേക്ക് പണമൊഴുക്ക്
Indian Rupee Depreciation കുവൈത്ത് സിറ്റി: കേരളത്തിലേക്ക് വിവിധ രാജ്യങ്ങളില്‍ നിന്നുള്ള പ്രവാസികളുടെ പണമൊഴുക്ക്. ഡോളറിനെതിരെ രൂപയുടെ മൂല്യം ഇടിഞ്ഞത് നേട്ടമാക്കിയിരിക്കുകയാണ് പ്രവാസികള്‍. വിനിമയനിരക്കില്‍ ഗള്‍ഫ് കറന്‍സികള്‍ കരുത്തുകാട്ടിയപ്പോള്‍ റെക്കോര്‍ഡ് തകര്‍ച്ചയാണ് രൂപയുടെ മൂല്യം രേഖപ്പെടുത്തിയത്. ശമ്പളം കിട്ടിയ സമയവും മികച്ച വിനിമയനിരക്കും ഒരേസമയം ആയതോടെ പ്രവാസികള്‍ ഹാപ്പിയായി. ഇതോടെ പണമയക്കാന്‍ എത്തിയവരുടെ എണ്ണത്തില്‍ 25 ശതമാനം വര്‍ധനയുണ്ടായെന്ന് വിവിധ എക്സ്ചേഞ്ച് വൃത്തങ്ങള്‍ സൂചിപ്പിച്ചു. നാട്ടിലേയ്ക്ക് പണം അയക്കാന്‍ മികച്ച ഉപാധിയായി പ്രവാസികള്‍ നോക്കിക്കാണുന്നത് എക്സ്ചേഞ്ചുകളും മൊബൈല്‍ ആപ്ലിക്കേഷനുകളുമാണ്. യുഎഇയിലെ എക്സ്ചേഞ്ചുകളിൽ ഇന്നലെ ഒരു ദിർഹത്തിന് 23.74 രൂപ നൽകിയപ്പോൾ വിവിധ കമ്പനികളുടെ മൊബൈൽ ആപ്പുകളായ ബോട്ടിമിലും ഇത്തിസലാത്തിന്‍റെ ഇ ആൻഡ് മണി ആപ്പിലും 23.86 രൂപയും വാൻസ് ഉൾപ്പെടെയുള്ള മറ്റു ചില ആപ്പിൽ രാജ്യാന്തര നിരക്കിനു സമാനമായി 23.87 രൂപ അയയ്ക്കാം. സേവനത്തിന് പ്രത്യേകം ഫീസും ഈടാക്കില്ല. അയച്ച ഉടൻ തന്നെ അക്കൗണ്ടിൽ പണം ക്രെഡിറ്റാകുകയും ചെയ്യും. രണ്ട് ദിവസത്തിനിടെ 10 പൈസയും ഒരു മാസത്തിനിടെ 56 പൈസയുമാണ് പ്രവാസികള്‍ക്ക് നാട്ടിലേക്ക് പണമയച്ചപ്പോള്‍ കൂടുതലായി ലഭിച്ചത്. 2024 ഫെബ്രുവരി 6ന് ഒരു ദിർഹത്തിന് 22.61 രൂപയായിരുന്നു. ഒരുവർഷത്തിന് ശേഷം ഇതേദിവസത്തെ നിരക്കുമായി താരതമ്യം ചെയ്താൽ 1.26 രൂപയാണ് ഓരോ ദിർഹത്തിനും കൂടുതലായി ലഭിച്ചത്. അഞ്ച് വർഷത്തിനിടെയുണ്ടായ മൂല്യശോഷണത്തിൽ 4.4 രൂപയുടെ വ്യത്യാസമാണ് രേഖപ്പെടുത്തിയത്. ഇതര ജിസിസി രാജ്യങ്ങളിലെ വിനിമയ നിരക്ക് പരിശോധിക്കാം. വിനിമയ നിരക്ക് (രൂപയിൽ) യുഎഇ ദിർഹം – 23.87, സൗദി റിയാൽ – 23.36, ഖത്തർ റിയാൽ – 24.03, ഒമാൻ റിയാൽ – 227.58, ബഹ്റൈൻ ദിനാർ – 232.53, കുവൈത്ത് ദിനാർ – 283.98 എന്നിങ്ങനെയാണ്.
Comments (0)